أرق هدية.. لأغلى إنسانة

الأم دي أغلى شخص على كل حد فينا.. وما حدش يقدر ينكر فضلها..

وفي حب الأم كلنا بنتساوى ولاد وبنات كبار أو صغيرين مسلمين ومسيحيين..

وأكيد مش هينفع نقتصر في تقدير الأم والاعتراف بفضلها على يوم واحد بس في السنة وهو يوم عيد الأم..

لكن يوم "عيد الأم" هو مجرد محاولة بسيطة من كل واحد فينا إنه يوفّيها جزء بسيط من حقها..

بس المشكلة إن كلنا بنحتار في اليوم ده في الطريقة اللي ممكن نعبّر لها بيها عن مدى حبنا لها واعترافنا بأهميتها الكبيرة جداً في حياتنا..

علشان كده حبينا في قمر 14 وإحنا بنحتفل بِعِيد الأم إننا نقول لكم على بعض الطرق اللي ممكن تكون بسيطة لكن هيكون لها تأثير جامد جداً على أي أم.

وهنبدأ مع بعض بالترتيبات اللي المفروض نعملها وإحنا بنحضّر للاحتفال بِعِيد الأم..


اعملي نفسك "مصباح علاء الدين"
دي فكرة حلوة أوي ودمها خفيف ممكن أي بنت تعملها لمامتها في يوم عيد الأم، وهي إنك أول لما تصحي من النوم في اليوم ده تروحي لمامتك وتقولي لها "كل سنة وأنت طيبة"، أنا النهارده مصباح "علاء الدين"، ومستعدة أنفّذ لك أي طلب تطلبيه مني، وطبعاً إخواتك ممكن يشتركوا معاكي في الفكرة دي سواء كانوا ولاد أو بنات، وتبدءوا كلكم تعملوا كل شغل البيت اللي هي بتعمله كل يوم؛ يعني تنظّفوا البيت وترتبوه زي ما هي بتحب، وكمان تعملوا لها الأكل اللي هي بتحبه، ولو ما فيش حد فيكم بيعرف يطبخ ممكن تستعينوا بكتب الطبخ، أو تسألوا أصدقاءكم وقرايبكم، وممكن كمان تسألوها هي نفسها عن طريقة عمل أي صنف أنتم هتعملوه، أكيد هتكون سعيدة جداً في الوقت ده إنكم بتحاولوا تعملوا أي حاجة علشان تسعدوها.


لمة الأسرة أحلى هدية
أهم حاجة لازم نأكّد عليها في اليوم ده؛ هو إن كل الأسرة تتجمع مع بعضها وتقضوا اليوم كله مع بعض.. لأن تجمّع الأسرة كلها مع بعضها بيكون أهم عند الأم من أي هدية وخصوصاً في الزمن ده اللي كل واحد فيه مشغول بحياته الخاصة وأصحابه ومشاويره... وممكن كمان في يوم عيد الأم تعزمي الناس اللي إنت عارفة إن مامتك بتحبهم، وبتكون مبسوطة وهي موجودة معاهم.


فقرة أحلى الذكريات
أكيد كلنا لينا مواقف حلوة كتيرة مع أمهاتنا سواء كانت المواقف دي مواقف جادة، وكان للأم دور كبير ومؤثر فيها؛ زي مثلاً النصايح اللي بتقولها لنا لما بنقع في مشكلة أو كانت مواقف كوميدية ومضحكة.... وطبعاً المواقف دي عمرنا ما بننساها وكل ما بنفتكرها بتأثر فينا جداً.

طيب إيه رأيكم لو بعد ما الناس كلها تتجمع، وقبل ما نقدم الهدايا بتاعتنا، تقعدوا مع بعض تسترجعوا بعض المواقف الحلوة دي وتعرّفوها إنكم فاكرين دورها العظيم في حياتكم، لأن أكيد ده هيخليها تحسّ بالفخر والسعادة... والإحساس ده هيكون أعظم وأجمل هدية تقدموها في يوم زي ده.


اختيار الهدية أهم من الهدية
الهدية دي رمز للمحبة والتقدير؛ ده غير إنه بيكون لها تأثير نفسي وعاطفي حلو جداً على الأم... بس أهم حاجة لازم تاخدي بالك منها هي اختيار الهدية المناسبة؛ يعني قبل ما تجيبي هدية لازم تكوني متأكدة من إنها مناسبة لشخصية مامتك، وإنها فعلاً محتاجة لها؛ يعني مش مجرد إنك تجيبي هدية والسلام، وبعد كده هي ما تستعملهاش في أي حاجة...

والأفضل لو تفكّري مع إخواتك قبل يوم عيد الأم بفترة علشان يكون عندك الوقت الكافي إنك تنزلي وتشتري اللي أنت عايزاه.. ويا ريت تتفقوا مع بعض كل واحد منكم هيجيب إيه علشان ما تجيبوش هدايا مكررة، وكمان بلاش تجيبوا هدايا تكونوا جبتوها لها السنة اللي فاتت؛ يعني حاولوا إن الهدايا تكون مبتكرة ومش متكررة ومفيدة في نفس الوقت.


محفظة عليها أول حروف من اسمها

ودي أفكار ممكن تساعدك إنك تختاري هدية مامتك على حسب شخصيتها؛ فمثلاً...

لو كانت مامتك شخصية عملية جداً وبتشتغل؛ فإنتي ممكن تجيبي لها هدايا زي..

* Flash memory شكلها أنيق علشان تحفظ شغلها عليه؛ خصوصاً لو كانت بتعمل شغل كتير على الكمبيوتر.

* قلم شيك.

* ميدالية شيك، وممكن إنك تضيفي عليها نوع من الخصوصية؛ بإنك تكتبي لها عليها كلمة حب أو شكر.

* محفظة جلد شيك وأنيقة عليها أول حروف من اسمها علشان تحتفظ فيها بالكروت والأوراق المهمة.


******************************



مفرش سرير عليه صور للأسرة أو برواز شكله جديد أو طقم شاي شيك

لو كانت مامتك بتحب التجديد وبتحت التغيير في ديكور البيت؛ فممكن تجيبي لها هدايا زي..

* مجموعة شموع شكلها حلو ومبتكر وتحطيها في غرفة نومها أو في أي مكان في البيت؛ بحيث تضيف شكلاً
جديداً.


المجموعة الخاصة بالخياطة

* فازة ورد شكلها شيك وجديد.

* طقم شاي؛ بس يكون شكله مختلف ومش تقليدي.

* بطانية أو مفرش سرير، ولو عندك إمكانيات ممكن إنك تطبعي عليه صور مختلفة للأسرة مع بعضها ولمامتك، ودي هتكون فكرة حلوة وجديدة.

* برواز صور شيك وتحطّي فيه صورة لها تكون بتحبها.

* أباجورة أنيقة علشان تحطها في أي كورنر في الشقة.

* مجموعة من زهور الزينة علشان تدّي روح وديكور للبيت.


**********************************



مجموعة كاملة من كريمات العناية بالبشرة والشعر أو إكسسوار مكتوب عليه ماما

لو كانت مامتك بتحب تعمل حاجات بإيديها زي مثلاً تفصيل الملابس أو شغل الكروشيه والتريكو؛ فممكن تجيبي لها هدايا زي...

* المجموعة الكاملة الخاصة بالخياطة واللي بيكون فيها إبر خياطة ومقصات وأنواع وألوان مختلفة من الخيوط وغيرها.

* مجموعة الإبر الخاصة بالتريكو والكروشيه والخيوط الخاصة بها.

* بعض الكتب التي تحتوي على كل ما هو جديد في مجال الخياطة أو الكروشيه.


********************************


لو كانت مامتك بتحب تهتم بنفسها وتتابع الجديد في عالم الموضة والتجميل؛ لكن مش بتلاقي الوقت الكافي علشان تعمل ده؛ فممكن تستغلي عيد الأم في إنك تديها الفرصة إنها تهتم بنفسها بإنك مثلاً..

* تشتري لها مجموعة كاملة من كريمات العناية بالبشرة والشعر.

* تحجزي لها ميعاد عند الكوافيرة علشان تعمل لها "نيو لوك"؛ يعني ممكن تغيّر قصة أو لون شعرها، وتعمل ماسكات
لبشرتها وصدقيني هتكون مبسوطة جداً.

* تشتركي لها في نادي صحي "جيم" علشان تمارس فيه التمارين الرياضية وتقدر توصل للوزن المناسب.

* تشتري لها طقم خروج أو عباية بيت شيك، أو تجيبي لها شنطة وحذاء علشان تكمّل به طقم عندها.

* تشتري لها عقد قيّم أو خاتم شيك لو كانت بتحب الإكسسوارات.


وأعتقد إن بكده مامتك هتكون مبسوطة جداً لإنك افتكرتيها في اليوم ده، وكمان فكّرتي في الهدية اللي تناسبها وتسعدها..

وطبعا الأهم من ده كله هو إننا نحاول دايماً نجتهد ونتفوق في مذاكرتنا أو في شغلنا؛ لأن أهم شيء عند أي أمّ في الدنيا هو إنها تشوف أولادها متفوقين، علشان تكون فخورة بيهم، وتحسّ بنتيجة تعبها وتربيتها ليهم..

وفيه حاجة كمان مش لازم ننساها في اليوم ده، وهي إننا نفتكر قرايبنا اللي ربنا مارزقهمش بأولاد، ونقول لهم كل سنة وهما طيبين، أو نحاول إننا نروح نزورهم في البيت ولو لمدة عشرة دقائق، ويكون معانا أي هدية ولو حتى هدية بسيطة، علشان ندخّل الفرحة في قلوبهم في يوم زي ده.


وفي النهاية أحب أقول لكل أمّ كل سنة وإنتِ طيبة..
ويا ريت تبعتوا لنا وتقولوا لنا رأيكم في الموضوع..
وتقولوا لنا كمان هتجيبوا إيه لمامتكم في عيد الأم..
وكمان احكوا لنا عن المواقف الطريفة..
اللي حصلت بينكم وبين مامتكم وإنتم صغيرين ومش قادرين تنسوها..
مستنينكم..